Freda kulturminne i privat eige, kulturmiljø og kulturlandskap 2017

Tilskot til freda kulturminne i privat eige, kulturmiljø og kulturlandskap

Fylkeskommunen fordeler kvart år tilskot til restaurering og istandsetjing av freda bygningar og anlegg frå nyare tid. Midlane til tilskotet kjem frå statsbudsjettet, posten tilskot til freda kulturminne i privat eige, kulturmiljø og kulturlandskap (kap. 1429, post 71).

Tilskotsordninga er for:

• private eigarar og forvaltarar av bygningar og anlegg som er vedtaksfredta etter Lov om kulturminne
• private eigarar og forvaltarar av freda eller spesielt verneverdige kulturminne og kulturmiljø som er typisk for liv og verksemd langs kysten
• private eigarar og forvaltarar av landets ni freda kulturmiljø, men og til andre særleg verdifulle kulturmiljø og landskap
  

Søknad skal sendast gjennom regionalforvaltning.no og frist for søknad er 1. desember 2016.

Midlane på posten går i hovudsak til bevaringsprogrammet freda bygningar i privat eige. Kulturmiljø, kystkultur og kulturlandskap får òg tilskot frå posten. Midlane under posten er relaterte til nasjonalt mål: «Freda bygningar, anlegg og fartøy skal ha ordinært vedlikehaldsnivå innan 2020». Nettsida Miljøstatus.no viser grad av måloppnåing for dei nasjonale måla.

Mål

Freda og andre særleg verdifulle kulturminne, kulturmiljø og kulturlandskap i privat eige skal vere sette i stand til ordinært vedlikehaldsnivå innan 2020.

Kriterium for måloppnåing

• Tiltak retta mot freda bygningar og anlegg i privat eige.
• Tiltak retta mot freda eller spesielt verneverdige kulturminne og kulturmiljø langs kysten.
• Tiltak retta mot freda kulturmiljø og andre særleg verdifulle kulturmiljø og landskap.

Tildelingskriterium

Ei målgruppe er private eigarar og forvaltarar av bygningar, anlegg, kulturmiljø og landskap som er vedtaksfreda, automatisk freda, mellombels freda eller der fredingssak er under behandling. Tilskot skal dekkje meirutgifter, heilt eller delvis, i samband med antikvarisk sikring, istandsetjing, vedlikehald og skjøtsel av freda kulturminne og kulturmiljø, i samsvar med fredingsføremålet. Følgjande prioriteringar gjeld: tiltak som stansar og hindrar ytterlegare forfall, mellombels sikring og tiltak som sikrar bygningar og anlegg det finst få av.

Andre målgrupper er private eigarar og forvaltarar av freda eller spesielt verneverdige kulturminne og kulturmiljø som er typiske for liv og verksemd langs kysten. Tilskota blir fordelte på grunnlag av følgjande prioriteringar: tiltak som stansar og hindrar ytterlegare forfall, mellombels sikring og tiltak som sikrar kulturminne og kulturmiljø som det finst få av. I arbeidet med kystkulturen skal det leggjast til rette for at kulturminne og kulturmiljø kan medverke til å skape attraktive lokalsamfunn.

Siste målgruppe er private eigarar og forvaltarar, i første rekkje knytt til dei ni freda kulturmiljøa, men òg til andre særleg verdifulle kulturmiljø og landskap. Tilskota skal primært tildelast tiltak som er forankra i forvaltnings- og skjøtselsplanar.

2 mill. kroner er øyremerkte sikring og istandsetjing av samiske bygningar. Midlane vil bli utbetalte av Riksantikvaren etter oppmoding frå Sametinget. Riksantikvaren vil gi nærare føringar for bruken av tilskotet.

For spørsmål vedrørande søknad, kontakt

Arlen Synnøve Bidne
Nærings- og kulturavdelinga, Sogn og Fjordane fylkeskommune
tlf : 415 30 934
epost: arlen.synnove.bidne@sfj.no

For tekniske spørsmål knytt til søknad og bruk av www.regionalforvaltning.no, kontakt

Kristin Arnestad
Nærings- og kulturavdelinga, Sogn og Fjordane fylkeskommune
tlf: 906 16 843
epost: kristin.arnestad@sfj.no.