Utviklingsstøtte til distriktskommunar

Ønskjer de å styrke utviklingsevna og attraktiviteten i kommunen dykkar? Vestland fylkeskommune lyser ut inntil 5 millionar kr i tilskot, og tilbyr fagleg støtte til distriktskommunar som over lengre tid har opplevd nedgang i folketal og/eller sysselsetting.

Søknadsfristen er 15. desember 2026.

Denne ordninga skal støtte distriktskommunar med å arbeide godt og langsiktig for å utvikle kommunen og samfunnet rundt, og det vert også gjeve fagleg støtte til dei kommunane som ønskjer det. Fleire kommunar kan gjerne samarbeide om tiltak. Kommunar utanfor målgruppa kan inngå i eit slikt samarbeid.

I samband med utlysing av denne ordninga held fylkeskommunen eit digitalt informasjonsmøte 9. november 2026. Påmelding finn de her 

Mål for ordninga

Distriktskommunar (i klasse 5 og 6 i SSB sin sentralitetsindeks) med langvarig nedgang i folketal og/eller sysselsetting, kan søkje om tilskot til tiltak som skal bidra til å handtere denne situasjonen, mellom anna ved å:

• Auke attraktiviteten for busetnad og næringsliv
• Styrkje kommunen sin kapasitet til å arbeide med utvikling og attraktivitet

Der fleire kommunar samarbeider om tiltak, kan også kommunar utanfor målgruppa inngå. Kommunar som allereie mottar omstillingsmidlar, kan ikkje søkje på denne ordninga.

Fylkeskommunen ønskjer å bidra med ein forsterka innsats over tid. Målet er at kommunen sit att med ei varig styrkt utviklingsevne, også etter at tilskotsperioden er avslutta. 

 Midlane er hovudsakleg dekte med regionale utviklingsmidlar frå staten, og føringane frå statleg hald seier at måloppnåinga for tilskotet vil verte vurdert opp mot følgjande målsettingar:

1. Utviklingskapasitet og -evne er styrkt i kommunen. Det er jobba systematisk med å sikre varig utviklingsevne etter at tilskotsperioden er avslutta.
2. Kommunen er ein meir attraktiv stad å bu og drive næring.

Døme på innsats

Innsats kan til dømes vere knytt til:

• Kunnskapsdriven samfunns- og næringsutvikling
• Å greie ut næringspotensial og nye moglegheiter
• Å mobilisere næringsliv, frivilligheit, innbyggjarar og andre lokale aktørar i eit felles utviklingsarbeid
• Stadattraktivitet, særpreg og bulyst
• Tiltak for møteplassar, trivsel og tilhøyrsle

Kva kan det søkjast tilskot til?

Tilskotet skal berre dekkje kostnader som er nødvendige for å realisere tiltaket. Dette kan inkludere prosessleiing og -støtte, utarbeiding av faglege grunnlag og mindre investeringar som er avgjerande for gjennomføringa av tiltaket og for god måloppnåing. Tilskotet skal bidra til noko nytt eller meir enn det som alt finst, og ikkje berre oppretthalde eit eksisterande tilbod. Vidare skal tilskotet ha utløysande effekt, det vil seie at tiltaket ikkje vil verte gjennomført, eller ikkje i ønskt omfang eller til ønskt tid, utan tilskotet frå fylkeskommunen.

 Innanfor ramma av forskrifta* kan kommunen tildele tilskot vidare til offentlege og private verksemder som driv med tiltak som fell innanfor føremålet med tilskotsordninga. Ønskjer kommunen å gjere dette, må det kome fram av søknaden. Vidaretildelte midlar kan ikkje nyttast til kommunen sitt eige interne planarbeid eller politikkutforming, til dømes kjøp av tenester i samband med kommunen sine eigne plan- og strategiprosessar.

(*Sjå felles føresegner og elles det som gjeld særleg for tilskot til kommunar med langvarig nedgang i befolkning og sysselsetting av særleg omfattande grad, og felles føresegner.)

Meir informasjon om utlysinga finn du på nettsida til Vestland fylkeskommune. Vi ber søkjarar merke seg at det er der de finn dei fullstendige retningslinjene for ordninga. 

Kontaktperson for ordninga er Even Vaular, e-post: even.vaular@vlfk.no